Putin Cozah Nih Russia Mipi Caah Tih A Nung Taktak Mi Oder A Chuah

Putin cozah nih Russia mipi caah tih a nung taktak mi nawl an chuah cang. Russia ram cu Kawlram bantuk an si cang. Ukraine an kah ruang ah an mah ram chung buainak in a khat cang.

Putin cozah hlutraw nihcun Russia ram chung ah a dih lomi thawngpang a tial tu le a share tu poh cu thong kum 15 tlak a si lai. Cu pinah rian hrang tuanter a si lai i phaisa cawiter a si rih lai tiah nawl an chuah cang.

Russia ram ah zalonnak a um ti lo. Social media zalonnak a um bak ti lo. Russia ram chung ah private le group media a simi pawl tamtuk an phih cang hna. An mah cozah TV le Russia cozah a tanh tu media pawl lawng an onh cang hna. Zei dang TV le media poh cu phih piak dih an si cang ti a si.

Cu lawng a si rih lo. Russia hi ramdang nih dantatnak pe uh tiah a au mi poh tlaih i thong kum 15 tlak a si rih lai. Rian hrang tuan ter pinah phaisa lemter a si rih lai ti ah nawl an chauh cang hoi. Russia cozah kha an mah mipi nih doh kho bak hna hlah seh tiin Putin cozah nihcun an mipi an rengh cang hna.

Putin cozah nih Ukraine a kah mi hi a ram chung mipi tampi nih an duh lo. Cu ruang ah Moscow khuapi tel in khuapi 50 leng ah Ukraine kah kan duh lo tiin mipi lam an zawh hna. Putin cozah palik pawl nihcun an tlaih hna i thong an thlak hna. Meithal zong in an kah hna tiah media cheukhat nih an langhter.

Putin cozah nihcun Russia mipi pawl sinah Ukraine kan kah mi hi kan ral hna sinah humhimnak kan tuah tiin nan ruah lai tiah an chimh hna. Russia mipi le Russia ram himnak ding caah kan ralkap nih ral an doh tiin nan ruah lai tiah an mipi kha an chimh an cawnpiak an thanh hna.

Russia cozah cu Ukraine an kah ruang ah vawlei cung ram tampi nih dantatnak an tuah hna. Cu ruang ah ram chung ah sipuazi a tla tuk cang. Russia cozah zong an phaisa hmuhnak a tla tuk cang. Russia mirum pawl phaisa tamtuk an sung cang. Russia mipi an buai tuk cang hna. Harnak fak pi nih a den ve cang hna. Tu bantuk in thla khat thla hnih hrawng an kal rih ahcun Russia cu vawlei ram sifak pawl ah ai chuah te lai tiah an zumh cio.

Be the first to comment

Leave a Reply

Your email address will not be published.


*