Cheuhra cheukhat hi raltuknak caah kan hman awk a si maw? Raltuknak caah hmang usih law a thiang lai maw, a sual lai maw?
Kan ram le kan miphun damnak ding caah le dothlennak ding caah Laimi zumtu Khrihfabu hna nih kan cheuhra cheukhat le kan thawhlawm hi raltuknak caah hmang usih law Pathian lung a tling lai maw a thiang lai maw tihi ruah ngai cio mi a si. Nihin tiang kan Pastor le kan Evanzalist te hna nih fiang ko in an chim ngam lomi a si.
A hlan lio biakam hlun chan ah cheuhra cheukhat an hun zoh, biakam thar i cheuhra cheukhat zong an hun zoh tik ahhin kan Pastor le kan Evanzalist hna zong nih fiang ngai in an chim ngam lomi a si. Chinmi kan bu chung ahhin vawlei lei bu nak in Biaknak le Khrihfabu hi phaisa a ngeimi cu an si fawn. Vawlei lei bu cu phaisa tampi kan ngei fawn hna lo. Tulio kan dothlennak ah le phaisa a herh tuk lio a si fawn. Khrihfa bu nih kan dothlennak caah phaisa a hlutu tampi an um cang hna.
Biakam hlun chung ah Moses te hn le Joshua te hna ral an rak do zungzal. Israel miphun cu rak an rak do zungzal. Mah lio can ah khan an cheuhra cheukhat kha Vainam sernak caah, le raltuknak thil thuam le hriamnam cawknak caah an rak hmang bal maw ti zong cu zoh a hung ngai hnga.
A si khawh ahcun Chinmi hna nihhin kan raltuknak caah Khrihfabu thawhlawm le cheuhra cheukhat hi i hmang lo tein um kho sehlaw a tha bik ko. Khrihfabu phaisa hman hau lo tein pumpak le pengtlang cio nih kan thawh mi hi i deih usihlaw cucu a tha bikmi a si. Sinain pumpak le pengtlang cio nih kan pekmi chawva nih a kan deih fawn lo ruang ah Khrihfabu thawhlawm le cheuhra cheukhat zong a hun hnursuan cangnak a si.
Nang zeitindah na ruah. Khrihfabu cu Pathian ta a si. Pathian nih a dirhmi a si. Pathian riantuannak caah kan thawh mi thawhlawm le Cheuhra cheukhat hi raltuknak caah kan hman awk a si ko tiah na ruat maw?
Leave a Reply