CDF Vialte Hi I Fonh Dih Hna Sehlaw Kan Thazang A Thawng Deuh Lai

CDF hna hi i fonh dih hna sehlaw kan thazang a thawng deuh tiah ruah a si cang. Ralhrang nih uknak an lak hnu ah Chin ramkulh ah hriamtlai phu tampi an hun chuak.

A pengtlang cio in CDF dirh a si. CDF lawng si loin Army thar tete zong an hung dir hna. Chin ramkulh ah hriamtlai phu dihlak hi CNA le ZRA tel cun phu 30 tluk hrawng kan hung si cang.

Pengtlang kip ah CDF an um. Cu CDF cu headquater um lem loin mah pengtlang cio in nawlngeihnak um dih a si. Tahchunhnak ah CDF Thantlang ah CDF Hakha nih nawl a ngeih lem lo. Amah CDF Thantlang tein nawlngeihnak sang bik a ngei. Cu bantuk in Zophei CDF zong anmah tein nawlngeihnak sang bik an ngei. CDF Mara, CDF Zotung, CDF Mindat le tibantuk vialte kha anmah tein nawlngeihnak an ngei cio hna.

Mahhi CDF vialte hi uknak pakhat tang ah um hna seh. Mah pengtlang cio mih pu loin CDF pakhat min hi pu hna sehlaw bawmhnak zong hi CDF min pakhat lawng in pek siseh law Chin ralkap hi kan thazang a thawng deuh lai i ralhrang hi kan tei deuh hrimhrim ko hna lai tiah Chin kan pa le mifim tampi nih an ruah cang.

Chin mifim kan pa le cheukhat nih an ruah vemi ahcun pengtlang cio in kan dir ahhin ramleng lei in phaisa thawh zong kan fel deuh lai. Cun ramchung lei in kan mino hna a lut mi zong an tam deuh lai, an lung a tho deuh lai i a tha deuh ti kha an rak ruah vemi a si.

CDF cu thla 5 hrawng a hun kal cang. Voitampi ralhrang he an i kap cang hna. Tu ning kan dirhmun ahcun mah nak in kan thawn khawh deuhnak ding ahcun i fonh dih hna selaw mah nak hin kan thazang a thawng deuh lai ti kha Chinmi tampi nih an ruah ning le hmuh ning a si.

Be the first to comment

Leave a Reply

Your email address will not be published.


*