Salai Lungthli Tum Nih KIA Le KNU Tulio An Dirhmun A Chimmi Hi Zeitin Na Ruah Ve

Salai Lungthli Tum le KIA le KNU kong a chimmi ahhin a dik maw na ruah ning a si ve maw? Nizan ah khan Chin mino ah cathiam pakhat a simi Salai Lungthli Tum nih live in KIA le KNU te hna tulio an dirhmun le an sining a chim. Tulio ralhrang kong ah KNU le KIA an dirhmun a chimmi hi na pom ning a si ve maw. A chimmi a tang lei ah.

KNU hi ralhrang an dohnak ahhin an mah hmunhma ca lawng an do. Anmah hmun chung ah ralhrang a lut mi lawng hi an kham hna, an doh hna. Karen pumpi laknak ding caah le Kawlram pumpi thlennak ding caah ral an tu lo. An umnak hmunhma a him khawhnak ding lawng ah ral an tuk mi a si.

KIA zong anmah hmunhma himnak ca lawng ah ral an tu. Myitkyina khuapi ah KIA nih ral an tu bal lo. Kachin ramkulh pi lak khawhnak ding in KIA nih ral an tu lo. KIA umnak hmun hrawng a him khawhnak ding le anmah an i ven khawhnak ding lawng in ral an tu. Cucu tulio KNU le KIA an dirhmun a si.

Kannih Chin miphun kan pa le mifim hna nih kanmah kan hmunhma ca lawng si loin Kawlram pumpi thlennak ding caah raltuk an kan forh mi hi cu a si kho bak lo. Anmah Kawl miphun biatak tein rak an tuk hlan lo poh cu kanmah Chinmi le tlangcung mi lawng raltuknak in cun Kawlram pumpi hi ai thleng kho bal lai lo.

Kanmah kan hnunhma a him khawhnak ding lawng ah le kan hmunhma lawng ah i vennak ding in ral kan tuk ve a hau. Chin ramkulh dihlak lak ding le Kawlram pumpi thlen hi Min Aung Hlaing thlak khawhnak ding tiang in ral kan tukmi hi cu kan mino tamtuk nunnak a liam cang i mino tamtuk nunnak liam rih ding hi a si kho bak lo tiah Salai nihcun live in a chim.

Salai Lunghli Tum chimmi hi cheukhat nih a dih bak an ti ve. Cheukhat nihcun kan ral cu kan kah hna ne lo ah an mah nih pei an kan kah leh cu. A tu hi ralhrang uknak kan thlak lo ahcun zeitik hmanh ah kan thla kho ti lai lo. Ralhrang uknak hi kan tei bak a hau tiah an ti ve.

Be the first to comment

Leave a Reply

Your email address will not be published.


*