Nihin Kawlram Ralhrang Uknak Tang Ah Tanghra Caminpuai An Thawk Cang

Kawlram cu nihin tanghra camipuai an phi cang hna. Kawlram pumpi ah nihin March 31,2022 ni ah ralhrang uknak tang ah tanghra caminpuai an tuah cang hna.

Nihin nikhat ahhin Kawlca an phi i thaizing ahhin English an phi lai ti a si. March 31 in April 9 tiang kan tuah lai tiah ralhrang nih an rak thanh cang mi kha a si.

Kawlram ah covid a um hnu in le ralhrang nih uknak an lak hnu ah sianginn kai a um tuk ti lo. A bik in ral a thawhnak hmun pawl hna cu sianginn kai lo bak in um dih an si hna. Sinain tanghra caminpuai cu an phi thiamthiam ko ti a si.

Kanmah Chin ramkulh zong in tanghra caminpuai a phi ding minung 2000 leng an um. Minung 2000 leng nih an min an rak pek. Thantlang, Hakha, Mindat le Kanpetlet tu ahcun min a pemi ho hmanh an um lo. A dang myone ahcun min a pemi an rak tam ngaingai.

Tutan ralhrang uknak tang ah hranghra caminpuai phitu a tambik cu Rakhine ramkulh le Nay Pyi Taw in an si. Rakhine ramkulh cu kan theih cio bang in CDM a tuah mi zong an um lo. Sianginn zong an kai peng thiamthiam ko caah an nih cu cu hlan kum ning bantuk tein caminpuai zong an phi thiamthiam ko.

Ralhrang uknak tangah tanghra a phimi hna hi NUG nih zeitindah a ti te hna lai theih a si lo. Ralhrang uknak a tlak tikah NUG cozah a kai tikah tutan ralhrang uknak tang tanghra awng hi a pom piak kho hna lai maw kho lo timi hi NUG nih fiang tein a chim zong a herh ngai cang mi a si.

NUG le PDF nih CDM tuah uh ti a si. CDM nan tuah lo ahcun dan kan in tat hna lai. Ralhrang rian bawm hna hlah uh ti a si. Sinain cheukhat ralhrang uknak tang ah fimnak an cawng. Rian an tuan thiam ko. Mah vialte hi NUG cozah kai tikah dantat loin le pom piak an si than sual ahcun a poi taktak te lai.

Be the first to comment

Leave a Reply

Your email address will not be published.


*