Min Aung Hlaing cu Vamlong ralkap 8 nih a zamtak than. Myanmar ralhrang hruaitu Min Aung Hlaing cu a kuttang pawl nih an zamtak thluahmah ko cang.
Irrawaddy ramthen Pathein myo ah a ummi Kawl ralhrang Vanlong ralkap minung 8 cu an zam tiah nihin ah DVB nih a tial. Kawl ralkap Vanlong ralkap a zammi hna hi minung 8 an si. An zam ning cu ralkap 4 hi a luan ciami Januray khan khunh an hal i a tu tiang an ra ti lo. A dang minung 4 cu khoika an um zong theih a si lo tiah an chim.
Min Aung Hlaing nih uknak a lak hnu ahhin vanlong lei ralkap a zammi zong hi an tam ngaingai. Vanlong lei ralkap a lu bik a simi Maung Muang Kyaw zong a rian in Min Aung Hlaing nihcun a rak phuah i a dang a rak kaiter bal cang.
Min Aung Hlaing nih uknak a lak hnu ahhin Kawl ralkap le palik hi minung 5000 leng an zam cang ti a si. Ralkap le palik tampi hi zam an duh ko nain an zam kho lo. A ruang cu an nupi le fale kha sakhan chung ah an chiah hna. An zam ahcun an nupi le fale nih fak tuk in tuar ding a si caah an zam khawh lonak a si.
Ralkap le palik a zammi hna hi sakhan chung ah a ummi an nupi le fale nih an tuar. Cu lawng si loin an nupi le fale zong kha ralhrang nih an tlaih hna i an hrem hna ti a si. Cheukhat ralkap cu cantha an hmu kho lo. An zam sual lai tiah ralram an kal lo ahcun sakhan ah an chiah hna.
Min Aung Hlaing nih uknak a lak hnu ah Kawl ralkap hi minung 10,000 leng an thi cang i tamtuk hliam an tuar cang. An thazang a der ngaingai cang. Nufatin raltuknak hmun ah an nunnak a liam. An thi ruak hmanh an i la kho tawn lo. Cu tluk cun harnak hi an tong tawn caah ralkap nihhin an celh bak lo ti a si.
Cu lawng si loin a tu hi Kawl ralhrang nihcun phaisa tuh an siam ti a si. Phaisa sit kha an siam khawh ti lo caah a tuh a deu tu kha na siam i ralkap pawl lahkhah an pek hna. An riantuan pawl lahkhah an pek hna ti a si. Cu ruang ah tulio Kawlram ahhin phaisa tuh a tam taktak ti a si. Mahhi phaisa tuh cu an mah ralkap nih an siam mi a si tiah an chim.
Leave a Reply