Min Aung Hlaing Nih Muihnak Khur Chung Ah A Thlak Hna Khi A Si Ko

Min Aung Hlaing nih muihnak khur chung ah a thlak hna khi a si ko cuh. Min Aung Hlaing rian an bawmh cu muinak khur chung ah an luh khi a si ko. Dr. Ngun Cung Lian le Pu Ngun San Aung hi i chir lo awk an tha bak ti lo. An i chir taktak cang lai. A ruang cu a tu an dirhmun ahhin muihnak khur chung ah pei an um ko cu.

Ralhrang nih uknak an lak kaa hrawng ah khan cun Min Aung Hlaing lei kan tan zong ah a poi lai lo tiin an rak ruah. Min Aung Hlaing hrim zong kha a ruah ning a rak si ti lo. Thimnak kan tuah khawh colh lai i can tlawmpal bawi kan tuan ah a tha ko lai tiin an rak ruah diam.

Mipi nih sandah an piak lai, ralkap nih tlawmpal an kah hna lai i mipi hi an dai te ko lai. Tlangcung hriamtlai tlawmpak an tho lai i remdaihnak kan ser khawh te ko lai. NCA lamthluan pei a um ko cang cu tiin an rak ruah diam.

Sinain an i ruah ning bantuk a si ti lo. Kawlram pumpi mino vialte PDF tiin hriam an tlaih. Tlangcung miphun mino vialte meithal an tlai dih cang hna. Khoika poh ah mipi ralkap an um dih cang. Khoika hmun hmanh hi ralhrang le a bawmtu hna caah a him ti lo.

Dr. Ngun Cung Lian le Pu Ngun San Aung dirhmun hi zoh hmanh. An i chir taktak cang lai. Zam an duh zong ah an zam kho ti lo. Kir than an duh zong ah an kir than kho ti lo. Ralhrang lei an tan cang caah vansang in an um cang lai.

An chungkhar in ralhrang sinah an um nain leng zong an chuak ngam ti lo. Dawr zong an kal ngam ti lo. Ralhrang sakhan lawng ah nifatin an um cang. An duhnak hmun ah an kal ngam ti lo. Inn chung lawng ah khua an sa ko cang. An caah thongthlak bantuk khi a si ko hme cu. Lakkhah cu zeizat hmanh va ei hna sehlaw leng zong chuah ngam lo, dawr zong ah kal ngam lo. Ralhrang sakhan lawng ah um peng ko cu an caah zeidah a thatnak a um.

Anmah an rak i ruah ning ahcun 2010 in 2015 lio USDP party uknak chan bantuk khan a si te lai i kan duhnak ah kan tlawng lai. Kan duh mi rian kan tuan lai, bawi kan si pah lai tiin an rak i ruah.

Sinain a tu an dirhmun hi zoh ko. Kum zeizat chung dek leng chuak ngam lo, dawr zong ah kal ngam loin an chungkhar in sakhan kulh chung lawng ah an um rih lai. A donghnak ah tlaih i thihdan pek te ding thiam khi an si fawn. Min Aung Hlaing nih muihnak khur chung ah a thlak hna khi a si ko hne cu.

Be the first to comment

Leave a Reply

Your email address will not be published.


*