Min Aung Hlaing Le Prime Minister Hun Sen An Biaruahnak

Min Aung Hlaing le Cambodian Prime Minsiter tonnak an ngeih i an i ceih mi pawl bia cu a tang lei bantuk hin an si hna.

Myanmar ram ah ralhrang nih uknak an lak hnu in Kawlram ralrang cu vawlei cung ramkip hna nih cozah ah an pom kho hna lo i meeting zong can tampi kai an senh hna lo. An konglam cu vawlei cung bu nganbik UN zong ah ceih lengmang a si i vawlei cung biaceih zung ngan bik ICJ le ICC zong ah an sualnak cu report tuah lengmang a hung si.

Cu lio ahcun Asean Chairman a si ding mi Cambodian Prime Minister Hun Sen nihcun Min Aung Hlaing cu a dirpi cu cozah ah a cohlan. Asean meeting zong ah i tel ding in biatak tein a dirkamh than.

Cambodian Prime Minister Hun Sen cu Kawlram ah rat in Min Aung Hlaing ton ai tim. Sinain Kawlram mipi hna nih ra hlah tiah social media in lamzawh nak in duh lonak an langhter. Social media a hmang ngaimi a si caah Facebook comment zong in cei in an thuat.

Sinain Prime Minister Hun Sen cu Kawlram mipi duhnak kawl loin January 7,2022 zing ah Kawlram cu a hung phan taktak. Kawl ralhrang pawl nih sunglawi ngai in an rak don i an rak conglawmh len.

Cambodian Prime Minuster Hun Sen le Min Aung Hlaing cu zungkhan an tonnak an ngei. Cu hnu ah a dang ralhrang bawi pawl he zung ah tonnak an ngei rih. Hun Sen nihcun Min Aung Hlaing he ton biaruahnak an ngeih ah a tang lei pawl hi an ceih mi a si.

Kawlram kong ah Indonesia ah Asean nih rak ceih chah cangmi lungtlinnak phun 5 kha zulh ding le tuan chuah ding, Kawlram ah remdaihnak a um khawhnka hnga ding caah biatak tein tuan tti ding, Cambodia le Myanmar kar ah pehtlaihnak tha deuh ngeih i chawleh thalnak lei zong ah tha deuh in pehtlaihnak tuah ding pawl kh an i ceih mi a si.

Prime Minister Hun Sen nihcun Kawlram caah covid khamnak si, zawtnak caah a herh mi sii ai le Mask pawl bawmhnak tampi zong Kawlram caah a hun phurh chih i ralhrang pawl nih cohlannak zong an tuah.

Prime Minister Hun Sen nihhin Kawlram rat ai timh i a rat hlan ah khan Kawlram mipi dothlennak a tuah tu hna cu dai tein um i buainak tuah hlah tiah a rak kan ti. Ralkap uknak hi cohlan ding in le kap hnih biaruahnak ngei ding in a rak kan ti.