Dr. Ngun Cung Lian Ralhrang Sin A Luh Hi Lunghring Ngai A Si

Dr. Ngun Cung Lian ralhrang sinah a luh mi hi lunghring ngai a si. A thlithup thil a um kho mi a si. A mah lei nih zeihmanh chimnak a ngeih lo caah hin.

Chinmi lak ahcun upadi thiamsang bak a si. US ah upadi thiamnak in Ph.D tiang a dih mi a si caah pa men a si lo. Upadi kong cu a thei bakmi a si i Kawlram chung hmanh ah upadi kong ahcun pa za timi a si. Ramkhel lei zong pa za a si. Ramkhel kong ahhin upadi a thiam mi nihcun ramkhel kong hi an thiam chih dih ti a si fawn.

Dr. Ngun Cung Lian hi zei ruang ah dah Min Aung Hlaing sinah hin a luh hnga timi hi khauruah har taktak a si. Zeidah a duhnak a si hnga tihi khauruah har ngai mi a si. Mahhi a khauruah a har ngaimi Chinmi tampi an um. Ruahnak pakhat ahcun, Dr. Ngun Cung Lian nihhin a ruahnak ai palh kho. Kawlram cu ralkap nih uknak an lak lengmang mi a si caah a hlan chan ralkap uknak bantuk khan kan um lai i bawi ka tuan lai, rengsang ka tuan lai tiin ai ruah kho.

Ruahnak pahnihnak ahcun, anmah ralkap chung lawlaw sinah hin ka lut lai i a si khawh chung in ralkap hi cawnpiak ka zuam hna lai. Upadi an theih khawhnak ding le an thiam khawhnak ding in cawnpiak ka zuam hna. Anmah ralkap chung lawlaw ah ka lut lai i a thli tein dothlennak ka tuah lai tiin a ruah khawh.

Dr. Ngun Cung Lian cu miphun a dawmi pa a si. Miphun a dawt ruang ah pei CNA zong ah kum can sau pi a tuan cu. CNF zong ah kum can saupi a tuan i CNF lei nih biaceihtu ah an hmanmi a rak si. Kum 2010 ah Thein Sein cozah a hung kai hnu ah CNF le Kawl ralkap cu remdaihnak min an thut. Cu hnu ah Dr. Ngun Cung Lian cu Thein Sein nih a sawm i Pu Aung Min he tlangcung miphun hriamtlai le Kawl ralkap karlak ah remdaihnak sertu palai rian an rak tuan ti.

Thein Sein cozah chan kum 2015 in a hung dih i NLD cozah chan ah an hung kai. Pu Aung Min te phu Ngun Cung Lian te phu rian kha Suu Kyi nih pehzulh ti loin Panglong Conferance tiin min a hun thlen i midang nih an van tuan.

Cu hnu ah Ngun Cung Lian nihcun Suu Kyi le NLD upa pawl cu fak piin a soisel tawn hna. Tlangcung hriamtlai phu kong an hngal lo, remdaihnak lam thluan kal ning zong an thei lo. Ral voikhat hmamh a tu bal lomi nih hriamtlai le hriamtlai kar ah palai tuan cu sullam a um lo tiah fak piin a rak soisek hna.

Ralhrang nih uknak an van lak i Min Aung Hlaing cu Ngun Cung Lian cu ruahnak petu ah ai sawm. Zeihmanh thawngthanh loin Ngun Cung Lian cu ai thawh i Nay Pyi Taw ah ralhrang he cun rian an tuan tti. Ralhrang he rian an tuan tinak ahhin Ngun Cung Lian hi voi hnih te lawng bak a lang rih. Miphun le ram a rak daw ngaimi a si ko nain Min Aung Hlaing sinah a luh hi lunghring ngai cu a si ko.

Be the first to comment

Leave a Reply

Your email address will not be published.


*