Breaking News: KNU Nih Ralhrang Helicopter Pakhat Tla Bak An Kah Hoi

KNU nih Kawl ralhrang Helicopter pakhat tla bak in an kah hoi i ralhrang minung 30 leng an thi hoi.

Karen ramkulh Kongkarat peng ah Kawl ralhrang le KNU kar ah kahnak fak a chuak i Kawl ralhrang lei in minung 30 leng an thih pinah ralhrang Helicopter pakhat zong tla bak in an kah piak hna tiah theih a si.

Nihin January 10,2022 ni ah Karen ramkulh Kongkarat peng ah Kawl uico le KNU kar ah kahnak fak a chuak. KNU le PDF an i bawm i ralhrang he fak ngai in an i phomh. Chun sml 1:00 hrawng ah khan kahnak a chuah hi a si. Kawl ralhrang lei nih Helicopter pathum an hman i an kan kah. Helicopter pakhat cu tlak bak in kan kah tiah KNU nih an chim.

Kawl ralhrang le KNU kar i kahnak ahhin Kawl ralhrang Helicopter pakhat an rak kah thlak piak bal cang hna. Kan hnu ah Loikaw myo i kahnak zong ah PDF nih Kawl ralhrang Helicopter pakhat zong tla bak in an kah piak hna. KIA zong nih Kawl ralhrang Helicopter pakhat tla bak an rak kah piak ve bal cang hna.

Min Aung Hlaing nih uknak a lak hnu ahhin Kawl ralhrang Helicopter pathum bak kah thlak piak an si cang. Tilong 5 hrawng kah thlak piak an si rih fawn. Ralhrang sakhan tamtuk an sung rih. Khuate ah a ummi sakhan a um ti lo. Khuapi lawng ah sakhan an ngei cang.

Ralhrang company Mytel tower 300 leng hrawh piak an si hoi. Mytel tower pakhat ahhin Kawlram phaisa in ting 2000 leng a dih. Cu vialte cu hrawh piak an si. Ralkap 2000 leng an zam hoi. Palik 5000 leng an zam hoi. Ralhrang 15,000 leng an thi cang i tamtuk hliam an tuar.

Min Aung Hlaing nih uknak a lak hnu ahhin ralkap pawl hi thancho lei si loin tum chuk leng an panh thluahmah. An ngeih ciami hriamnam le phaisa tampi an hman. Hriamnam thar laknak le cawknak lam an ngei ti lo. Phaisa an i deih ti lo.