Breaking News: Kawl Uico Ralhrang Helicopter Tla Bak An Kah Piak Hna

Breaking News: Kawl Uico ralhrang pawl Helicopter pakhat KNDF nih tla bak in an kah piak hna. Thawngpang tha takta a si hih.

Nihin January 8,2022 ah Kayah ramkulh khuapi Loikaw le Demosu peng ah Kayah hriamtlai le Kawl ralhrang kar ah kahnak fak a chuak i Kawl ralhrang lei in minung 30 leng an thi. A thimi ahhin ralhrang bawi pakhat zong ai tel tiah theih a si.

Kawl ralhrang nih Loikaw le Demosu kahnak ah raltuknak Jet fighter pahnih le Helicopter zong a hman hna. Raltuknak Tank zong a hman hna. Sinain ralhrang pawl an mual a pho.

Nihin January 8,2022 zan sml 8:00 hrawng ah khan Loikaw khuapi kahnak ah ralhrang nih an hmanmi Helicopter pakhat cu Kayah htiamtlai hna nih an kah i a tla tiah KNDF nih thawng an thanh. Cu pinah Demosu peng kahnak ah ralhrang raltuknak Tank pakhat zong kang dih in kan kah tiah KNDF nih thawng an thanh.

Loikaw khuapi ahhin nihnih chung pehtlai in kahnak a chuak cang. Loikaw khuapi um khuami thong tampi tamtang ah le pawngkam khuate ah an zam hna. Ralhrang bomb thlak ruang ah khuami 6 leng an nunnak a liam cang i tampi hliam an tuar.

Loikaw khuapi chung ah kahnak a fak tuk caah khuami hna cu a si khawh ahcun khuapi chung in zam ding le i thuh ding in Kayah mipi ralkap nih an fial hna. Kayah mipi falkap nih an mipi hna cu a himnak hmun ah an zampi hna. An thilri an thiar piak hna ti a si.

Kayah ramkulh ah minung ting thum fai hrawng an umnak a si. Ralhrang nih uknak a lak hnu ah fak tuk in a kah hna i minung ting khat leng ralzam dirhmun in khua chuahnak in ramtang ah an um hna.

Kawl ralhrang pawl cu an mual a pho chin lengmang ko cang hih. KIA nih Helicopter pakhat an rak kah piak bal cang hna. Raltuknak Tank zong tam ngai an hrawh piak cang hna.

Photo: Google chung ah lakmi a si. A mah ralhrang helicopter a tlami taktak a si lo. A tlami taktak hmanthlak hmuh khawh a si lo caah ai remnak in tarmi a si.

Be the first to comment

Leave a Reply

Your email address will not be published.


*