Cambodia Prime Minister nih Kawlram mipi dai tein um uh tiah a chim. Kawl Uico ralhrang a bawmtu Cambodia Prime Minister Hun Sen nih Kawlram mipi cu dai tein um uh a kan ti ko hih.
Nizan January 7,2022 ah khan Cambodian Prime Minister cu Kawlram ah a rak phan i Min Aung Hlaing he ton biaruahnak an ngei. Cu hnu ah Kawl ralhrang pawl he zong biaruahnak an ngei kho tiah theih a si.
Min Aung Hlaing le Hun Sen cu biaruahnak an ngei i an biaruahnak pawl cu Cambodian le Myanmar ram kar ah pehtlaihnak a that khawh deuhnak ding le thanchonak a that deuh khawhnak ding pawl an ceih. Cu lawng si loin Asean nih Kawlram kong ah biachahnak phun 5 an ngeih mi zong tlamtlinh khawh i zuam ding, kawlram ah a si khawh chung daihnak tuah khawh i zuam ding kha an i ceih bik mi cu a si.
Cambodian Prime Minister Hun Sen cu Kawlram a rak rat hlan deuh te ah khan Kawlram mipi hriam a tlaimi hna le le ralhrang a doh mi hna dai tein um ulaw daihnak ser khawh i zuam uh tiah a chim.
Kawlram mipi hna nih Cambodian Prime Mimister cu Kawlram a rat ding kong ah Kawlram mipi duhlalonak tamtuk an langhter. Kawlram ah ra hlah tiah fak piin social media zong ah an langhter ko nain ngai loin Kawlram ahcun a van ra thiamthiam ko.
Kawlram a van rat tikah Kawlram caah covid sii le a herh mi thilri tampi zong an van phurh pah hna. Hun Sen nihcun Min Aung Hliang cu Asean meeting zong ah kai kho ding in a zuam piak. Cambodian Prime Minister nihcun Min Aung Hlaing cu Kawlram cozah ah a cohlan. Kawlram mipi nih Hun Sen hmanthlak cu mei in an khangh i ralhrang bawmtu tiah an ti.
Leave a Reply