Thantlang Cu Kan Sung Cikcek Ko Cang Ee

Thantlang hi cu kan sung cikcek ko cang ee. Thantlang kan sungh ning cu a fak in thinlung a kuai bak ko.

Thantlang khuapi ahhin inn 2500 hrawng a um i inn 800 deng a kang cang. Zatceo dengmang a kang cang tinak a si. Inn ai pinh deuhnak le inn a that deuhnak poh cu a kang dih cang i inn hriang deuh lawng hi a tangmi a si ko cang. Hi pinah hin ceilak an khangh than te lai i a dihlak in an khangh te ko lai.

Thantlang hi a luan ciami Septepber 18,2022 ah khan Sianginn sang ah CDF le ralhrang kar ah kahnak a rak chuak i ralhrang a thimi an tamtuk caah ralhranh nih inn cu mei bomb in an kah i 19 hrawng a rak kang. Inn kang mei phalh ding in a kalmi Pastor Biak Kolh zong ralhrang nih meithal in an kah i a nunnak a rak liam.

September 20,2022 a hnu bik khuami nih khua cu an zamtak hna. Cheukhat Mizoram ah le cheukhat pawngkam khuate ah tiin khuami hna cu an zam dih hna. Cu hnu ah Thantlang ah kahnak a um lengmang. Kahnak a um poh ah ralhranh nih inn cu an khangh lengmang i nihin tiang ah inn 800 leng an khangh cang. Biakinn zong tamtuk an khangh cang i zung zong tamtuk a kang cang.

Thantlang um ralhrang hna hi a hlan i kahnak a chuak hlan ahcun ralhrang 300 hrawng an um lai tiah ruah a si. Sinain i kahnak ah a thimi an tamtuk ve cang, hliam tuar mi zong an tamtuk ve cang caah ralhrang hi 70 hrawng lawng an um cang lai tiah ruah a si.

Thantlang ah ralhrang nih inn an khangh cangmi hi a man in tuak ahcun relcawk lo a si cang. Inn sak thannak ding ah a dih dingmi phaisa he van tuak ahcun a tamtuk hringhran cang. Tam taktak kan sung tinak a si ko.

Kawlram chung ahhin khuapi ah kahnak a chuak cio ko. Chin ramkulh chung zong ah Hakha le Mindat khuapi chung zong ah kahnak a chuak ko. Sinain khuapi kanghnak a um tuk bal lo.

Thantlang ah a ummi ralhrang hi an sual ning a fak khun. CNA umnak hmunhma le CNA camp he ai naih bik khuapi a si caah ralhrang nihhin an ral khun caah a si ko lai tihi ruah mi a si cang. Thantlang hi hei tei hmanh usihlaw mah khi vutcam ah a cangmi lak ah khin khuami zong an um kho hnga maw tihi ruah awk a um ngai cang. Kawlram chung ah Thantlang cu a sung bik kan si ko ee.