Ramdang In Phaisa Kuatu Ngei Ve Lomi Caah Nun Hi A Har Ko Cang Ee

Ramdang in phaisa kuatu a ngei lomi hna chungkhar zeitindah khua kan sak cang ne lai. Lungrethei kan si ko cang ee.

Kan ram cu covid ruang ah khan harsatnak ton hram kan i thawk. NLD cozah lio ah khan cun bawmhnak tete zong a um pah lengmang i ai ning ngai kan rak ti. Sihmanhsehlaw ralhrang nih uknak an lak hnu ah fak tuk in harsatnak kan tong hna.

Kan ram cu raktuknak in a khat cang. Company rian tuan awk zong a um ti lo. Innsak le a dangdang riantuan awk zong a um ti lo. a tulio ahcun phaisa zong i cawi khawh a si fawn ti lo.

Cu ruang ah ramdang in phaisa kuatu a ngei ve lomi chungkhar caah cun khuaci kan mui ko cang ee. Thilman nih le a kai chin lengmang fawn. Zapi zaran nihcun sa cuai hmamh hi cawk khawh a si ti lo. Sa cawk chim loin facang hmanh i kan caw kho tuk ti lo. Ruah ahhin lung a mit ko cang.

Matupi khua hna ahcun Facang tun khat ah ting khat le a cheu a phan cang ti a si. Cu tluk cun Facang man a kai i thilman a kai cang. Facang hmanh cawk awk a um set lo ee ti a si.

Kan pawng kan kam in meithal thawng le bomb puah thawng nih a kan zelh peng fawn. Zei ti dah kan din lai i zei rawl dah kan ei lai tiin lungrethei in kan um lio ah dam lo hna a van si cun lung hi a dong i vawlei cung nun hmanh zuam lo can hi tampi a um tawn ko.

Ramdang in phaisa kuatu a ngeimi caah cun tlawmpal ai ning deuh ko. Tlawmpal tete an van kuatmi hna nih an hna a ngamter deuh ngai hna. Ramdang in phaisa kuatu a ngei ve lomi caah cun khoika in dah phaisa kan lak ve lai tihi ruah ah ruah khawh asi lo. Do kan cawi hna zong a chamnak an kan ngei ti lai lo ti an phan caah kan tong ti lo.

A tulio Chin ramkulh dirhmun in ramdang lei in phaisa kuatu ngeih ve lomi caah cun nun hi a har bak ko. Sihmansehlaw Pathian a um ko. A mi fa hna a kan veng zungzaltu Pathian a um ko tiin kan i hnem tawn ee.

Be the first to comment

Leave a Reply

Your email address will not be published.


*