Ralkap mawṭaw 100 leng Laitlang lei ah a kai

Ralkap mawṭaw 100 leng Laitlang lei ah a kai:

SAC ralkap mawṭaw 100 leng cu Magway ramṭhen, Pakokku peng in Laitlang lei ah an rak kai tiah CDF-Mindat nih a thanh.

Pakokku in SAC ralkap mawṭaw cu a voikhatnak ah mawṭaw 30 leng an rak kai cang i atu ah mawṭaw 100 leng he an rak kai ṭhan tiah a langhter.

Mawṭaw pawl cu ṭha tein an khuh dih caah zeidah an phorh timi fiang in theih a si lo tiah CDF-Mindat biachimnak nawl a ngeitu Salai Ha Om nih People’s Spring ah a chim.

“Mawṭaw hi 100 an luan lai tiah ruahdamh a si. Pungṭaung Pungngia lei zongah an samh chap. Mah mawṭaw he cun Matupi lei ah an kal lai tiah ruahdamh a si”.
SAC-Ralhrang Matupi an phak a si ahcun, Matupi an kal a voi linak a si cang lai. A hlan voithum tiang ah SAC-Ralhrang pawl cu CDF-Mindat nih an kah lengmang hna i SAC-Ralhrang a thimi an tam.

“Matupi hi Chin ramkulh a laifang ah a tla. Cun, Chin ramkulh chaklei le thlanglei a pehtlaihnak karlak ah Buha an ngeih caah eidin, lahkhah le hriam bawmh ah an ratmi a si men lai” tiah Salai Ha Om nih a chim.

SAC ralkap pawl Mindat-Matupi lamcung an rat a si ahcun fak piin kan kah hna lai tiah CDF-Mindat nih timhtuahnak a ngeih.

Chin ramkulh ah thlah a simi ralkap hna nih CDM tuah nan duh a si ahcun lunglawm tein don nan si lai tiah Kanma, Pauk, Kyaukhtoo le CDF-Mindat nih an thanh.