Ralhrang Nih Uknak An Lak Hnu Ah Chin Ralkap Minung 80 Leng An Thi Cang

Ralhrang le Chin mipi ralkap i dohnak ah Chin ralkap lei in minung 80 leng nih kan ram le miphun caah nunnak an pek cang ee.

Kawl uico ralhrang nih February 1,2021 ah uknak an lak hnu ah ramchung hmun kip ah lamzawhnak a chuak i buainak a chuak. Chin ramkulh hmunkip zong ah lamzawhnak a chuak i buainak a chuak ve. Cuticun mipi lamzawh mi hna cu ralhrang nih tlaih i thongthlak, meithal in kah le thilak in hrem a hung si.

Cu tik ah mipi hna nih thim ding lam an ngeih ti lo caah mino tampi hna cu ramtang ah kal in ralkap thiamnak an cawng hna. Meithal an tlai hna. Meithal hriamnam in ralhrang uknak doh ding in an i tim hna.

Chin mino tampi hna zong nih thim ding lam kan ngeih ti lo caah ramri ah kal in ralkap tintan an kai. Pengtlang kip cio in ralkap tintan kai i ralhrang uknak cu doh cio a si hung cang.

Ralhrang nih uknak an lak hnu ahhin Chin ramkulh chung ah kahnak voi tamtuk a chuak. Chin ramkulh hmun kip ah kahnak fak a chuak. Mindat peng hi kahnak a fah biknak a si. Ralhrang nih uknak an lak hnu ahhin i kahnak ah Chin pasaltha hna minung 80 leng nih kan ram le miphun caah nunnak an pek cang ti a si.

Meithal a tlai ve lomi khuami hna zong ralhrang kut in 87 leng kan nunnak a liam cang. Cu chung ah minung 7 cu an nung buin mei in an khangh hna. Nunnak liammi chung ah nu le kum tling lo ngakchia zong an i tel.

Ralhrang nih uknak an lak hnu ahhin Chin ramkulh chung ah ralhrang a thi cangmi dihlak hi a tlawmbik 1000 cu an si lai tiah zumh a si ve. Ralhrang tamtuk an thi i tamtuk hliam an tuar ve.

Tulio hrawng hi Chin ramkulh ahcun Matupi peng le Falam peng ah kahnak fak a chuak. Falam lei ah ralhrang nih ralkap thazang tamtuk an hun chap caah Mualzual khuate hrawng ah kahnak fak a chuak. Matupi peng lei zong ah kahnak pehtlai in a chuak.