Nihin Chin Ralkap Nih Ralhrang 14 An Kah Thah Hna

Nihin Chin ralkap nih ralhrang minung 14 hellram ah an kuat khawh hna. Nihin January 26,2022 ni ah kan Chin ralkap hna nih Kawl ralhrang minung 14 hellram ah an kuat khawh hna.

Nihin January 26,2022 ah Matupi tatyi 304 i an sakhan cu CNA le CDF nih an kah hna i ralhrang minung 8 an thih pinah minung 10 leng hliam an tuar tiah Matupi CDF nih an langhter. Nihin January 26,2022 zanlei sml 5:00 hrawng ah khan Matupi ralhrang sakhan cu CNA le CDF nih an kah hi a si. Ralhrang pawl nih Miakpi an hman caah kan Chin ralkap hna cu hnu ah an pil than.

Kan hnu lei hrawng vialte kha Matupi peng ah kahnak fak tuk a chuak. Zotung tlang khuate tampi hna cu ralhrang ruang ah Mizoram ah an zam hna. Matupi peng i kahnak ah ralhrang tampi an thi i CDF lei zong in pakhat nunak a liam.

Tuan deuh ah khan Matupi peng ah khuami minung 10 hna cu a ruang um loin ralhrang nih an rak tlaih hna i an kalpi hna. Ralhrang pawl nihcun ramtang ah meithal in an kah hna i an thah hna. An ruak cu lamkam ah an hlonh hna i CDF nih an ruak cu an rak lak hna. Thinlung a fak taktak.

Cu lawng si loin nihin Kalay le Tamu kar ah Kawl ralhrang ZDF le PDF Kalay nih minung 6 bak an kah thah than khawh hna. Nihin ah Kalay lei in ralhrang pawl cu Tamu cozah riantuan lahkhah an rak phurh lai ti kan theih caah lampi in kan bawh hna i kan kah hna. Ralhrang pawl minung 6 hellram ah kan kuat hna tiah ZDF nih an langhter.

Nai hrawng ah ralhrang nih Chin ramkulh lei ah an thazang an hun chap caah Tedim peng ah kahnak fak a chuak. Falam peng lei zong ah kahnak fak a chuak i Matupi peng lei zong ah kahnak fak a chuak rih. Kawl ralhrang tampi an nunnak a liam. Ralhrang nih uknak an lak hnu nikum April thla i December thla tiang ah Chin ralkap nih ralhrang minung 1029 an thah hna.