Matupi Peng Ah Ralhrang 100 Hrawng Ramtang Tupi Chung Ah An Vakvai

Matupi peng ah ralhrang pawl tupi chung ah an vak i an kal. Kawl ralhrang pawl nih Chin ramkulh ahhin Motor lam an hrawng ngam tuk ti lo.

Chin ramkulh Matupi peng ah Kawl ralhrang minung tam ngai cu ramtang tupi chung ah an kal i CDF le CNA nih an kawl cuahmah ko hna tiah theih a si.

Kawl ralhrang pawl hi khua chung zong ah an vak ngam ti lo. Motor lam zong ah an ngam ti lo. Motor lam an kal ahhin bomb puah hnawh le kah an ton lengmang cang caah ramtang tupi chung ah an kal i CDF nih kan kawl cuahmah ko hna tiah CDF pakhat nih Delta News Agency sinah a chim.

Kawl ralhrang pawl hi Chin ramkulh Falam peng an rat zong ah khan ramtang tupi chung in an ra ti a si. Kalay peng Natchuang in an ra i Falam peng Waibulah cu an rak phan. Ke bak in ramtang in an ra. CNDF pawl nih lampi ah bomb an hmanh i a puah hnawh hna. Meithal zong in an kah hna i ralhrang 15 leng nizan ah khan an thah hna.

Chin ramkulh hi tlang ram a si. Fingtlang le horkuang a tamnak hmun a si caah Kawl rawn lei ah a ummi Kawl ralhrang pawl hna hi ramtang umkal an thiam lo. Fawi tein an tlau zau ti a si. Cu ruang ah ralhrang pawl nihhin hmunhma le thingram sining a thei deuh mi kha lam hruaitu ah an hman tawn hna.

Matupi peng chung ahhin ralhrang 100 hrawng cu ramtang tupi ah an vakvai ko ti a si. Cu ruang ah Matupi peng chung ah a ummi khuate mi hna zong ralrin ngaingai a hau. Chin ramkulh lei ah ralhrang nih thazang tampi an hun chap than cang caah Falam peng le Matupi peng ah kahnak fak a chuak.

Be the first to comment

Leave a Reply

Your email address will not be published.


*