Matupi Ah Ralhrang Nih Khuami Tampi An Tlaih Hna

Matupi ah ralhrang minung khuami tampi an tlaih hna i an kalpi hna. Matupi lei thawngpang a chia ngai.

Kawl uico ralhrang pawl cu Motor 90 reng lo in Mindat khan an kal i Matupi lei ah an kal. Lampi ah CDF le CNA nih an kah hna i ni tam ngai hnu ah Jamaury 20,2022 kha Matupi khua ah ralhrang pawl cu an phan cang ti a si.

Nihin Jamaury 21,2022 ni ah ralhrang pawl nihcun Matupi khua chung ah pa minung 10 leng an tlaih hna i an kalpi hna ti a si. Ralhrang tlaih hi tulio ahcun tihnung taktak a si. Khoika dah CDF an um tiah an hal hna lai an chim duh lo ahcun thah khawh mi an si caah thinphang taktak an si hna.

Kan hnu zong ah khan Matupi peng ah ralhrang nih Chinmi minung 10 an rak tlaih hna i an rak thah dih hna. An ruak cu CDF nih lampi ah an hmuh i an rak lak hna. Cu tluk cun ralhrang pawl hi an sual cang.

Matupi peng Zotung lei ah kahnak fak a chuak. Khuami tampi Mizoram lei ah an zam hna. Mizo kan unau hna nih tha tein an rak zohkhenh hna i an rak dawt hna. Mizo kan unau hna cung ahhin lawmh a um taktak khi a si. Anmah hi um hna hlah sehlaw Chin ralzam hi zei maw kan hei lawh hnga.

Chin ramkulh ahhin Matupi sakhan hi a ngan bikmi le ralkap zong an tam biknak a si. Cu ruang ralhrang nihhin a si khawh chung in Matupi sakhan hi humhim peng kha an i timh mi a si. Matupi in Chin ramkulh hi ralkap nih control khawh ding kha an i zuam mi a si. Matupi ralhrang sakhan lak zong hi a fawi lo dingmi kha a si.

Nizan nai ah ralhrang Matupi ah 500 leng a hung phan mi hi zeitik ah Magwe ramthen lei ah an kir than te lai timi hi a fiang rih lo. An kir than tik cu Matupi le Mindat kar ah kahnak fak a chuak than kho te mi dirhmun ah an um.

Be the first to comment

Leave a Reply

Your email address will not be published.


*