Matupi Ah Ralhrang Nih Khuami Minung 9 An Thah Cang Hna

Kawl uico ralhrang nih Matupi peng Chinmi minung 9 an thah cang hna.sualnak ngei lo Chinmi 9 cu Kawl uico ralhrang nih an thah cang hna.

Kan hnu ah khan Chin ramkulh Matupi peng ah Kawl ralhrang nih Chinmi minung 10 an rak tlaih hna. An kalpi hna i lampi ah an thah hna. A tu tiang theih khawh tawk ah minung 9 an thah cang hna ti a si. Cu chung ah CNF nih bochan ngaimi Pu Tui Dim zong ai tel i kum 13 ngakchia pakhat zong ai tel.

Thinlung a fak bak ko. Sualnak ngei lo le hriamnam zong ai tlaih ve lomi khuami ralhrang nih tlaih hna i ramtang ah thah ko hna cu thinlung a fak bak ko.

Nai hrawng Matupi peng ah Kawl ralhrang le Chin ralkap kar ah kahnak fak a chuak. Nithum chung hrawng a pek in an i kap cang. Kawl ralhrang lei zong in nunnak liammi an tam cang i hliam tuar mi an tamtuk cang.

January 5,2022 ah khan Matupi peng Sabawngte khua ah a ummi ralhrang minung 10 hrawng an umnak sakhan zong ralhrang nih an chuahtak. Helicopter nih a rak lak hna i Matupi sakhan ah a chiah hna tiah theih a si.

Matupi peng lei kahnak a fak tuk ruang ah Kawl ralhrang nih thazang tampi an chap. Pako in Mindat lei ah ralhrang Motor 90 le raltuknak Tank pahnih an ra i zahan Mindat ah an riak. Cu hnu ah nihin January 8,2022 ah Matupi lei ah an kal ti ah an chim. Ralhrang Motor pawl cu cung lei Helicopter nih a ven hna ti a si.

Chin ramkulh chung ah kahnak fak a chuak than khomi a si. Ralhrang nih Chinmi hi a thar in nam than a kan timh cang timi a lang. Chin ramkulh lei ah ralhrang thazang tamtuk an van chap hna. Falam peng lei zong ah ralhrang thazang 200 hrawng an chap caah kahnak fak a chuak.

Be the first to comment

Leave a Reply

Your email address will not be published.


*