Chin ramkulh thil man a kai taktak. Matupi ah facang tun khat ah ting khat le cheu a phan cang. Nihin ah Matupi lei in facang tun khat ah ting khat le cheu bak a phan. Cu hmamh ah cawk ding a um set lo tiah thawngpang theih a si. Arsa cuai khat ah 25,000 bak a phan i Chiti lang khat ah 15,000 a phan ti a si.
Ralhrang nih uknak an lak ruang ahhin Matupi lei ah facang a kal kho ti lo. Thilri a kal kho ti lo. Matupi ah ralhrang nih facang luh ter an duh ti lo. A luan ciami thla thum hrawng ah khan ralhrang nih Matupi ah facang luh hi an rak kham cangmi a si. Cu ruang ah mah tluk in facang man a fahnak hi a si ko.
Matupi peng ah a ummi CDF sinah facang a kal sual lai timi hi ralhrang nih an phan tukmi a si. Inn khat ah Facang tun khat cung ngeih zong a rak ngah lo. Cu tluk cun ralhrang nihhin Chin miphun an kan hrem. An mah ralhrang vialte cu sakhan chung ah ei cawk loin an i khon fawn ko.
Chin ramkulh dang zong thilman a kai taktak. A bik in facang man a kaimi a si. Ralhrang nihhin Chin miphun hi ei awk ngei hna hlah seh tiin an kan hrem hramhram mi khi a lo cang. Tulio hrawng Matupi peng chung ah kahnak a fak ngaingai. Cu kahnak ruang ahcun Matupi peng khaute tampi hna cu Mizoram ah an zam hna.
Dornak an kawl hna. Matupi ah ralhrang nih an thazang tamtuk an chap. Kan hnu ah Mindat le Matupi kar ah ralhrang Motor 90 leng in ralhrang minung 500 hrawng a kalmi hna zong Matupi sakhan an phan cang ti a si fawn. Chin ramkulh hmun thum Tefim peng, Matupi peng le Falam peng chung ahhin tulio hrawng kahnak fak a chuak. Nifatin kahnak a um zungzal ko. Kan miphun ralkap hna caah fak piin thlacam hna usih.
Leave a Reply