Hakha Thilman Kai Tuk Ruang Ah Mipi Lungrethei Le Thinphang In An Um Hna

Hakha khuapi thilman a kai tuk ruang ah mipi lungrethei le thinphang in an um ko hna. Hakha ah thilman a let hnih bak in a kai ruang ah mipi lungrethei le thinphang in an um hna.

Chin ramkulh Hakha khuapi ah thilman a kai tuk. Mipi lungrethei taktak in an um. A tu bantuk in thilman a kai ko ahcun cheukhat cu din ei awk ngei lo tiang in um a fawi te cang tiah khuami pakhat nih a chim.

Hakha ahhin a hlan ah 3000 man a simi kha a tu ah 6000 a phan cang. A let bak in thilman hi a kai. Cu hmanh ahcun dawr cheukhat ah thil cawk ding a um lonak zong a um len cang. A ruang ah kan ram buainak ruang ah Kalay le Mandalay ah duh ning in thil lak khawh a si ti lo. A hlan ah Kalay ah thil lak ah nithum a rau tawnmi hna kha a tu ahcun zarh khat zar hnih hna a rau cang.

Thil man a kai tuk cang caah hin ramdang lei in phaisa kuatu a ngei ve lomi caah lungrethei tuk a si. Ramdang in phaisa kuatu a ngeimi cheukhat caah cun ai ning deuh ko. Ramdang in phaisa kuatu a ngei ve lomi chungkhar caah cun nun hi a fawi ding a si ti lo. Inn hlan man te hmanh i pek khawh a si ti lo tiah khuami pakhat nih a chim.

Ralhrang nih uknak an lak hnu ah ramchung cu buainak le i kahnak in a khat. Riantuan awk zong cu hlan bantuk in a um ti lo. Khua khat le khua khat duh ning in umkal khawh a si ti lo. Zapi zaran caah cun lungrethie bak a si ko. Nun hi a fawi bak ti lo.

Matupi lei zong ah thilman a kai taktak khi a si. Facang tun khat ah a ting leng a phan cang. Chiti pung khat ah 15000 leng a phan cang. Cu hmanh ah cawk ding a um huaha lo tiah an chim. Min Aung Hlaing ruang ah mipi harnak kan tong dih ko.

Be the first to comment

Leave a Reply

Your email address will not be published.


*