Hakha Ralhrang Helicopter Tla Hmanthlak Pawl

Nihin Hakha ah Kawl uico ralhrang Helicopter a tlami hmanthlak pawl rak zoh cio uh. Farkung ah ai su i a tla tiah khuami pawngkam mithmutu hna nihcun an chim.

Nihin March 29,2022 zing sml 8:30 khan Kalay myo in a van i thawh i zing sml 9:30 hrawng Hakha Cawbuk sang a phak ah Helicopter cu a tla. Helicopter a tlak ahhin a khu zong a chuak. Ralhrang lei in baichim tu Zaw Min Tun nihcun thli nih fak tuk in a hranh caah a tla tiah a chim. Khuacan ruang ah a si tiah a ti. Helicopter chung ahhin ralkap pahnih le cozah riantuan pathum an um. An dihlak ah mimung 5 an si i hliam an tuar. Hakha sizung ah thopbul cuahmah an si ko tiah Zaw Min Tun nihcun a chim.

Mahhi Helicopter hi tukum March 31 in April 9 tiang tuah dingmi tanghra caminpuai phit dinh mekhun a van phurtu a si. Cu ruang ah sianginn saya te zong nih an van zulh hi a si. Tanghra mekhun pawl cu a rawk lo. Rian ngeitu sinah tha tein a phan ko tiah Zaw Min Tun nih a chim. CNA CDF kah mi a si lo ti zong a chim chih.

Tutan ah ralhrang Helicopter a tlak cu a tha ngai. Thlitu a fak pah ruang ah a mongtu nih a duhnak ah kalter kho ti loin Farkung a suk hi a si lai tiah ruah bikmi a si ko. Ralhrang nih uknak an lak hnu ahhin an Helicopter 5 hrawng le an Jet fighter pakhat tiin an tla cang. Kah ruang ah a tlami zong an um i anmah tein a tlami zong an um ve.

Chin ramkulh chung ah ralhrang Helicopter a hmasa bik a tlami a si. Helicopter pakhat an sungh cu kannih a doh tu hna kan caah cun thawngpang tha taktak a si. Kawl ralhrang caah Helicopter pakhat hmamh hi a fawi lomi a si ve. Ralhrang pawl hi an rat tikah Motor in ra ngam ti loin Helicopter deuh an hmang cang. Cu ruang ah Vanlong kahnak thami hi kan herh bakmi a si.

Be the first to comment

Leave a Reply

Your email address will not be published.


*