Chin ramkulh ah a voikhatnak bik Kawl ralhrang Helicopter a tla cang. Kawlram chung State dang ahcun a tla pah lengmang ko nain kannih Chinram ahcun a tu lawng ralhrang Helicopter tlak kan theih a si.
Ralhrang Helicopter a tlaknak a ruang hi cheukhat nih an chimnak ahcun Farkung ai pah le a tla an ti. A zuan ning hi niam tein zuan dawh a si. Cheukhat nihcun CDF le CNA nih an kah ko lai. Farkung cu a mah tein i pah awk a tha lo cuh an ti ve.
Hakha ah Kawl ralhrang Helicopter a tlaknak kong ahhin Kawl ralhrang lei nih thawngfiang chimnak an ngei rih lo. CDF le CNA lei zong nih thawng fiang chimnak an ngei rih lo. Ralhrang Helicopter cu a tla i a kang. A mongtu zong thih dawh a si.
A si zei hmanh ah Chin ramkulh ah ralhrang Helicopter pakhat a tlak cu a tha tuk mi a si. Ralhrang pawl Helicopter pakhat an sung tinak kha a si ko. Chinram ah Helicopter in van rat zong hi tih deuh ve cang hna seh.
Tulio hrawng hi Chin ramkulh hmunkip ah kahnak fak a chuak. Hakha le Gankaw lam Hakha peng chung ah zarh khat chung Chin ralkap le Kawl ralhrang pawl an i kap cang. Ralhrang nih Tinam khua inn 9 zong mei in nizan March 28,2022 ah an khangh. Ruavan khua zong inn an hrawh piak hna i thilri tampi an fir piak hna. Zokhua peng khua 10 bak khuami dihlak ramtang ah an zam hna.
cU lawng a si rih lo. Mindat le Matupi kar ah kahnak a fak rih. Mindat le Matupi kar ah ralhrang pawl Motor 80 leng le Tank pahnih in lampi ah an um ko. CDF le CNA nih lampi in an bawh hna i an kah peng hna. An kar ah kahnak fak a chuak. Tu zing March 29,2022 zing zong Mindat khuapi chung ah ralhrang le CDF kar ah suimilam cheu chung kahnak fak a chuak.
Leave a Reply