CDF Matupi Nih Fiang Tein Thanhnak An Tuah Cang

CDF Matupi nih thawngfiang an thanh cang. Matupi peng ah Uico ralhrang nih khuami minung 10 an thah hna nak kong ah CDF Matupi nih thawngpang fiang an thanh cang. A tang lei bantuk in an thanh.

January 6,2022 ah khan Matupi le Hakha kar lampi ah Kawl ralhrang le CDF Matupi kar ah kahnak fak a chuak. Kawl ralhrang thazang tam taktak in an kan kah.

Cu raltuknak pawng ah a ummi khuate pawl ah Kawl ralhrang cu an lut hna i January 6,2022 ah Kilawng khua in Lunghlaw khua lei ah khual a tlawngmi khuami minung 8 hna cu ralhrang nih an tlaih hna. Cu hnu ah January 7,2022 ah Kahse khua in Kilawng khua ah a kalmi khuami pakhat ralhrang nih an tlaih than. Cu pinah January 7,2022 ah Boithiza khua in Kahse khua ah a kalmi khuami pahnih cu ralhrang nih an tlaih rih hna.

Ralhrang nih khuami an dihlak ah minung 11 an tlaih hna. Mah cu minung 11 hna cu ralhrang nihcun lam chim tu ding ah an hruai hna i an kalpi hna. Kawl ralhrang nihcun khuami minung 10 hna cu fak tuk in an thah hna i an ruak cu lamkam ah an hlonh hna. Cu caah CDF Matupi kan lungfak in kan ngaihchia. Kawl ralhrang hi fak taktak in lehrulhnak kan tuah hna lai tiah CDF Matupi nih nihin January 9,2022 ah cathanh an chuah.

Mattupi peng lei ah pehtlai in nithum chung kahnak a chuak cang. Kawl ralhrang lei zong in nunnak liammi le hliamtuar mi an tam ngai cang.

Kawl ralhrang nih Matupi lei ah Motor 90 reng lo le raltuknak Tank pahnih bak in Matupi cu an kal hnawh hna. Nihin zing Mindat in an i thawh i khoika an phak cang theih a si lo. An cung in Helicopter pakhat nih a ven peng hna ti a si.

Matupi peng lei ah kahnak fak a chuak than kho. CDF le CNA hna zong ralring tein an um peng ko. Fak tuk in kan mipi hna ralhrang nih an kan thah mi cung ah phu kan hlam hrimhrim a hau.

Be the first to comment

Leave a Reply

Your email address will not be published.


*