CDF Kan Nau Le Hna Ramleng Lei In Ruahnak Cheuh Tuk Le Tlangtlak Tuk Hi A Herh Maw?

CDF kan nau le hna hi a lenglei in ruahnak kan cheuh hna le kan tlantlak tuk hna awk a si maw? CDF kan nau hna le nih thih le nun ri meithal kuan lak ah kan ram le miphun caah ral an tuk lio le timhtuahnak an ngeih lio ahhin ramleng lei in a phunphun in a ho poh nih ruahnak kan cheuh tuk hna awk a si maw timi hi theih ngai a hau.

Ramleng lei in cutin nan tuah lo ee, lam nan kham lo ee, hlei nan hrawh lo ee, ziah nan bawh hna lo ee, zuu nan ding tuk ee ti bantuk tlangtlak le ruahnak cheuh a tam ngaingai.

Mahhi CDF kan huat caah cun a si bak lai lo. CDF kan dawt tuk hna le ralhrang kan huat tuk hna, ralhrang hi thi dih cang hna seh tiin kan duh caah khin a va si ko. Sinain kan lungfah lung le ralhrang kan huat tuk hna lung in kan nau CDF hna ruahnak cheuh le tlangtlak tuk hi a herhnak a um maw tihi a si.

Kan nau le CDF hna hi catang sang pipi tampi an um ko hna. Mifim thiamsang tam pipi an um ko hna. Ralkap lei tintan tamli a ngei cangmi an um ko hna. Zeitindah ral kan tuk lai le kan cawlcangh lai timi tampi a thei cangmi an um ko hna. An mah tein zulhphung zong tha tein a tha bik in an i ser ve ko. Ramleng lei zong in ruahnak petu upa an i ngeih cio ko hna.

Cu bu ah a mizei poh nih Facebook ah CDF kan nau le hna tlangtlak le ruahnak cheuh hi a herh maw? Kan nau le thinlung lam kan vaivonh sual hna lai tihi kan ruah deuh awk a si lo maw? Ramleng ummi hna nihcun kan ram le kan miphun caah kan ti khawh phaisa kan thawh le kan bawmh hna hi kan rian a si i cu te cu fel tein kan tuah awk a si ko lo maw?

Be the first to comment

Leave a Reply

Your email address will not be published.


*