Breaking News: Matupi Peng Ah Kawl Ralhrang 100 Hrawng An Tlau

Breaking News: Matupi peng ah Kawl ralhrang minung 100 hrawng an tlau. Chin ramkulh Matupi peng ah Kawl ralhrang 100 hrawng an tlau.

Chin ramkulh Matupi peng ah Kawl ralhrang minung 100 hrawng cu ramlak ah an vakvai i an tlau cang tiah an chim. Matupi le Hakha lampi ah Kawl ralhrang pawl cu an tlau hi a si.

A ruang cu Kawl ralhrang pawl hi Motor lampi ah an kal ngam ti lo. CDF le CNA nih bomb an chiah dih caah lampi an hrawng ngam lo. Ramlak lamte in ralhrang pawl cu an kal i an tlau cang. Khoika an um le an kal zong theih khawh an si ti lo tiah an chim.

Kawl ralhrang pawl hi a tam deuh cu lam an thei lo. Motor lam lawng bak kha an theih mi a si. Kanmah Laimi nih kan hmanmi lamte pawl zong hi an fiang kho lo. Ramtang ah an lut ahcun an tlau colh ko. A chuk le a cho zong an i fiang lo. Fingtlang an hrawng le tiva an hrawn tikah khoika kan phan cang ti zong an thei ti lo. Fawi tein an tlau colh.

Matupi peng ah Kawl ralhrang nih thazang tamtuk an chap. Mindat in Motor 90 leng le raltuknak Tank pahnih bak in Matupi lam lei an panh. Cheukhat ramtang ah an kal i an tlau hi a si.

Kan hnu lei hrawng kha Matupi peng ah kahnak fak a chuak. Kawl ralhrang lei in a thimi le nunnak laimmi an rak tam ngai. Hliam tuar zong an rak tam.

Matupi peng ah Kawl ralhrang nih khuami minung 11 an rak tlaih hna i minung 10 cu an thah cang hna. Minung 10 ruak an hmuh cang. Ralhrang nih an kalpi hna i lampi ah an thah hna. An ruak lamkam ah an rak hlonh hna tiah CDF Matupi nih an chim. Ralhrang nih an thah mi hna chung ah kum 13 lawng a si rih mi pa ngakchia pakhat ai tel.