US nih Russia hi a kulh bak in a kulh dih ve ko cang. Putin hi um awk a thei ti lai lo. US nih ruah loin van ka phomh sual sehlaw zeitindah kai ven lai tihi ai ralring bak ve ko cang lai.
US nih Russia hi a kulh cang ti a fiannak cu Russia ramri pawng ram poh ah US nih a ralkap a chiah dih cang hna. Russia le Latvia hi ramri an si. Latvia ram cu ram hmete a si. Cu ram ahcun US nih a ralkap 800 leng a chiah hna. Raltuknak Vanlong thatha he a chiah hna.
Cu lawng si loin Russia le Norway zomg hi rili in ramri an si. Russia he ai naih ngaimi ram a si ve. Norway zong ah kan hnu ah khan a ralkap minung 400 bak a kuat than hna. Norway ram ah kan hnu ah khan NATO le US ralkap pawl zong raltuknak cawnnak tha tein an tuah ti.
Cu lawng a si lo. A tu Russia nih Ukraine a kah cuahmahnak ramri Poland ah US ralkap tampi an chiah hoi hna. US raltuknak Jet finghter F-35 pawl tampi an chiah hna. Poland in Ukraine ram ah Russia ralkap pawl zeitindah an cawlcangh tihi mit thep loin an zoh peng ko hna. Cu lawng si loin EU ram tampi ah US ralkap an chiah rih hna.
Russia cawlcanghnak hi vawlei cung ralpi pathumnak thawh ter a timh sual ahcun ral a thawh taktak hlan ah US le NATO ralkap nih Russia ceilak in phomh, cawl kho lo lak in phomh colh ding hi an i tinh mi a si. Cu ruang ah Russia hi US nih a kulh bak in a kulhnak a si. Cawl manh loin dai dep cheih colh a timh caah a si ko.
US le NATO nih Russia he ralthawh ding kan i tim lo an ti peng. A sinain Russia nih a kan hnur sual ahcun chim awk um loin kan phomh colh ve lai ti kha an chim pengmi a si. A tu tiang ahcun Russia nih NATO ram le US cu a hnursuang ngam rih lo hih.
Putin nih Ukraine a kah zarh khatnak hrawng ah khan cun Putin nih US le NATO ram cu fak ngai in a rak hro hna. Ukraine ram Donbas buainak kong zong ah nanmah US le NATO hi ai thlak tukmi nan si. A tu Ukraine kan kahnak zong ah a lamkip in ai telmi nan si caah Russia he kan i tong hna lai cu tiah Putin nih a rak hro bal cang hna.
Putin nih Nuclear hriamnam tiang in ai hro cang. A sinain NATO le US nihhin Russia hi a pel te hmanh an tih loh ti usih law kan palh lai lo. Russia ram kha hramhram in va kah rumro kha an duh lo caah a si. Sipuazi in fak taktak dantatnak tiah pinah Ukraine ralkap hriamnam thatha an pek hna. US le NATO hriamnam bak in Russia hi tamtuk an sung cang. An ralkap tamtuk an sung cang i an hriamnam tamtuk a rawk cang. US le NATO in Russia hi direct in a kap lo nain indirect cun a kah ko tinak a si.
Leave a Reply