NUG Nih Mah Zatzat Phaisa A Ngeih Ko Ahcun Ziah A Ralkap A Bawmh Ko Hna Lo

NUG nih mah zahzah phaisa an ngeih ko ahcun ziah laksawng hau lo tein hriamtlai hi phaisa an pek ko hna lo timi ruah a phu ngaimi a si.

Kan hnu ah khan NUG nih thawng thanhnak an tuah. Cucu Kawl ralhrang hriamnam cu zat rawk khawh ahcun phaisa cu zat kan in pek hna lai. Laksawng ah kan in pek hna lai ti khi an thanh mi a si.

Kawl ralhrang raltuknak Vanlong pakhat he CDM a lut mi cu US dollar in ting 5 laksawng pek nan si lai. Helicopter zong cu thiamthiam a si lai. Kawl ralhrang raltuknak Tank pakhat he CDM a lut mi cu laksawng ah US dollar ting 3 pek nan si lai ti a si.

Cu lawng si lo Kawl ralhrang raltuknak Vanlong a dir lio ah a rawk kho mi. Helicopter zong a rawk kho mi le raltuknak Jet fighter le Helicopter a zuan lio ah a kap thla kho mi, Kawl ralhrang hriamnam chiahnak pawl bomb in a hrawk khomi cu laksawng cu zat pek nan si lai tiah NUG a phunphun in thanh an tuah. Mahhi NUG nih ralhrang pawl an lemsoinak hna zong si khawh a si.

Thil a ummi cu NUG nih mah zatzat phaisa an ngeih ko ahcun hriamtlai pawl kha pei hriamnam tha cu zalh piak hna sehlaw Vanlong zong cu an kah khawh lai cu. Vanlong kahnak um loin a kap khomi laksawng cu zat kan in pek hna lai ti cu sullam a ngei lomi a si.

Vanlong kahnak kha cawk piak hna sehlaw Vanlong kah man ah laksawng pek zong an hau ti lai lo. Vanlong pakhat lawng hmamh si loin tampi zong an kah chap khawh lai cu ta.

A ngaingai ahcun cabuai cung ah a thumi NUG upa pawl nak dawh nifatin ramtang ah ralhrang he ral ai dohmi mipi ralkap nihhin Kawl ralhrang hi an huat deuh hna cuh. Kawl ralhrang meithal pakhat lak hmanh ah khin thih an ngamh cuh. Kawl ralhrang Jet fighter le Helicopter le Tank hna puak viar in kah an duh peng ko si. Sinain a kahnak hriamnam an ngei lo cu. A kahnak hriamnam ngei lo buin nan kah ahcun laksawng kan in pek hna lai ti cu sullam a ngei lem lomi a si.

NUG nih mipi ralkap hna hi a si khawh chung in hriamnam a bawmh hna awk a si. Zeitin lei dah hriamnam kan zalh khawh lai. Ram pakhat sin tal in hriamnam bawmhnak kan hmu kho lai maw tihi biatak teiin an i zuam peng a hau rih ko.

Nihin tiang ah kannih Chinmi kan ca lebang ahhin cun NUG hi zei ngai a si lo. A kan bawmh mi cu a um ve ko lai nain chim tlak khi a si lo. Ramthumnak ummi le ramthumnak Khrihfabu hi kannih Chinmi caah cun kan cozah an si deuh.

Be the first to comment

Leave a Reply

Your email address will not be published.


*