Kan Chinram dohtlennak caah hin NUG maw a biapi deuh kanmah Chinmi dah kan biapi deuh. A biapi veve ko nain a ho dah a biapi deuh timi kha kan tial duh mi a si lai.
Ralhrang nih uknak an lak hnu ahhin kum khat a tling deng cang. February 1,2022 cun kum khat a tling cang lai. Mahhi chung ah ralhrang uknak duhlonak cawlcanhnak tampi a um. Cucu mipi lamzawh in le meithal put in raldoh a si. Cu lawng si loin vawlei cung rankip hna he i bawm ralhrang pawl thazang zorter le dantatnak pek kha an si hna.
Ralhrang nih uknak an lak hnu in Chinram chung ah ralhrang kut in minung 60 leng kan nunnak a liam cang i tamli hliam kan tuar cang. Kan hawi le cheukhat an ke a tling ti lo, kan hawi le cheukhat an kut a tling ti lo. Kan inn lo tampi a rawk i raltuknak ah kan phaisa tamtuk a dih. Ruah ahhin thinlung fak celh ding a si lo.
Kan Chin ramkulh kan dohthlennak ca bak ahhin NUG maw a biapi deuh kanmah Chinmi tihi a si. NUG cu rampi huap in a tuanmi an si bantuk in kan Chinram ca zong ah a tuanmi an si ve. Kanmah kan i ruah ning ahcun NUG nih meithal thatha le phaisa tampi a kan bawmh lai i kan ral hi kan tei zau ko lai tiah rak ruah cio a si. A sinain nihin tiang NUG cawlcanghnak hi cu Tlangcung hriamtlai phu hna sinah cun chim tlak a rak si ti lo.
Chinmi nih kan ralkap caah kan thawh cangmi phaisa hi a tam taktak cang. Pengtlang kip in kan van thawh ciomi le Vaurawng ah kan thawh mi le Chinland Club ah kan thawh mi cio hi a tam ngaingai khi a si. NUG cozah nih bawmh mi cu Chinmi nih kan thawh mi sin ahcun chim tlak a si lo. NUG zong nihhin Chin ralzam le kan Chin ralkap hi an bawmh ve ko hna. Sinain kanmah Chinmi nih kan chuah mi phaisa he cun chim tlak khi a si lo.
Kawlram chung PDF pawl zong zoh hna tikah an mah tein bomb an i siam. Anmah tein meithal an i tuah. An mah tein Miakpi an i ser. A tam deuh cu mah tin an cawlcang hna. NUG nih a kar lak ah meithal le hriamnam cu a bawmh ve ko hna.
NUG hi cu vawlei cung ramdang hna Kawl ralhrang kha sual an phawt khawhnak ding le sipuazi le pehtlaihnak in dan an tat khawhnak ding kha biapi deuh in a tuah mi a si. Kan dohthlennak ahhin meithal le hriamnam a biapi. UN le ramdang hi cu ruah chan awk a um tuk ti lo. Cu caah NUG nak in kanmah hi a let tam tuk in kan biapi ti kha fian a hau. Catial tu hmuh ning le ruah ning a si.
Leave a Reply